Тәждік артериялардың рестенозы кезінде клиникалық және лабораториялық маркерлері

Бірінші жарты жылдың ішінде әсерлі жүргізілген тамырішілік отадан кейін кейде науқастарда стенокардия симптомдары қайта байқалуы мүмкін. Ол рестеноз, яғни емдеген стеноз жерінде қайтадан тарылудың дамуымен байланысты. Соңғы кездері тамырлардың өтімділігін қалпына келтіретін интервенционды оталарды бастан өткен науқастар саны жоғарлауда, сондықтан дәрігерлер мен науқастардың өздері осы мәселемен жиі кездесуде. Тәждік артериялардың рестенозы дамуының жоғары көрсеткіші олардың болжамдық маркерлерін және өзара ықпалын қарастыруға өзектілік тудырып отыр.

Мақсаты. Жүректің ишемиялық ауруы (ЖИА) бар науқастардың коронарлық артерияларына стент орнату жүргізгеннен кейінгі клиникалық және биохимиялық көрсеткіштеріне анализ жасау.

Зерттеуәдістері. Коронарлық артерияға стент орнату ота жасалған ЖИА бар 50 науқас зерттеуге қатысты. Науқастар 2 топқа бөлінді: І топқа – коронарлық артерияға стент орнату жасалғаннан кейін рестеноз дамыған 25 науқас, ІІ топқа – рестеноздың ешқандай көрінісі жоқ 25 науқас. І топта рестеноздың дамуына дейінгі жалпы орта уақыт 1,82±0,6 жылды құрады. Екі топта да зерттелушілер ерлер. Зерттеу кезінде келесі факторлар бағаланды: темекі тарту, артериалды гипертензияның, қант диабетінің болуы, жалпы қан анализі (лейкоциттер, лейкоцитарлық формула, ЭТЖ, тромбоциттер), коагулограмма, липидограмма (жалпы холестерин, триглицеридтер, ЛПНП, ЛПВП).

Нәтижесі. Екі топқа да 100 % жағдайда артериалді гипертензияның ІІІ дәрежесі диагнозы қойылды. І және ІІ топ науқастарында коронарлы арнаның үштамырлы зақымдалуы бірдей дерлік деңгейде 18 (72%) және 15 (60%); қант диабетінің ІІ типі 5 (20%) және 7 (28%), темекі тарту 15 (60%) және 14 (56%) тіркелді. Жалпы қан анализінде І топтың 5 (20%) науқасында ЭТЖ жоғарылауы және лейкоцитарлы формуланың солға жылжуы байқалды, қалған көрсеткіштер екі топта да нормаға сәйкес. Зерттелуші топтарда І топтың фибриноген деңгейі жоғарылаған 6 (24%) науқасты қоспағанда, коагулограмма көрсеткіші қалыпты деңгейде болды.

Қорытынды. Липидограмма анализі нәтижесі ІІ топқа қарағанда, І топта холестериннің жоғары деңгейін көрсетті. Дегенмен гиперхолестеринемия барлығында тіркелді.

Жыл: 2018
Қала: Шымкент
Категория: Медицина